">

">

ايه رأيك في مدونتي ؟؟ علشان تعرفو أنا أد ايه متواضعه !!

ايه رأيك في مدونتي .."علشان تعرفو أنا أد ايه متواضعه"


هنا يكف قلمي عن النزيف .. هنا يتجدد جرح جديد .. ليبقى جرح حاول الكثير منا كتمه .. لكنه أعلن الانهيار .. وفاض على دنيا المحال .. كان الأمل في تلك القافلة الراحله .. وقد ذهب .. وترك بقايا رماد انسان انتهى به الزمن .. فكلها في النهايه آلام تسكن دواخلنا تلتحفنا تارة ونلتحفها تارة .. ندفنها في لحد وندفن معها .. ولكن الألم يولد في القلوب الوفيه .. ويموت في قلوب الخائنين .. وهذه هي الحياة .. فصول قد تبدأ بفرح .. وتنتهي بألم .. ولكن هناك أشخاص .. كل فصولهم ألم .. معادلة سهلة الحل .. صعبة النتيجه ..

لـــظــــــروف خـــارجــــه عن ارادتــــي التعليقـــــــــات بـــــقــت فــــــووووووووووووق

١٨ يناير ٢٠١١

عايز أصاحب !!! (3)





السلام عليكم مجددا

نكمل موضوعنا والجزء التالت

وقبل ما نقول حاجه .. انا عارفه اني بطول بين كل جزء وجزء

بس ده لسبب ان توقيت عرض الموضوع غير مناسب

لانه وقت امتحاناتي فلا انا قادره اتابع المدونات علشان الناس تفضل فاكراني وتيجي

ولان معظم المدونين الوقتي اصلا في اجازه وانا كنت حابه ان الموضوع يوصل لكل الناس




نــــــــكـــــــمل بــقـــى

وقفنا المره الي فاتت فين ؟؟؟

وقفنا عند سؤال مهم ..

اذا كان الدافع من الصحوبيه هو الزواج . كام % من قصص الحب بتنتهي بالزواج ؟؟

السؤال ده سأله أحد الدعاه في جامعات عديده وفي مدرجات فيها الاف الطلبه

والاجابه كانت بتتراوح بين 1% الى 10 %

دي فعلا رؤيه الشباب  من خلال تجاربهم الشخصيه وتجارب اصحابهم ورؤيتهم

يعني 90 الى 99% من قصص الحب مش بتنتهي بالزواج

وكل واحد يروح لحاله وجايز يشوفو اتنين تانيين وجايز بردو يروحو لحالهم وهكذا

طب ايه اللي بيحصل للبنت يا جماعه ؟؟

لما بعد قصة الحب والصحوبيه دي يتفركش الموضوع ؟؟

البنت .. بيتكسر قلبها .. بتزعل .. بتعيط .. بتتعب .. بتتعذب .. بتحس انها اتجرحت !!

أصلها بتتجرح بأشكال مختلفه . بتتجرح كتير ، لانه بعد كده ممكن يروح يصاحب واحده صاحبتها

وبتتجرح كتير لانه هو بعد كده ممكن يقولها أنا مش هينفع اكمل وزهقت خلاص

أو بلاش هو دايما الي بيطلع وحش

هما الاتنين كانو في مرحلة عدم نضج ، وبعد شويه يقولو ايه ده ؟؟ ايه الهبل بتاعنا ده

لان مع فترة المراهقه وبداية فترة العشرينيات بيكون كل واحد باصص للي أدامه على انه مفيش زيه

وبيعيش في الخيال ومش بيشوف الواقع ولا بيشوف عيوب اللي ادامه

وأحيانا وبالذات في فترة المراهقه  بيدخلو في مرحلة التقديس يعني ان الطرف الاخر ده ملوش مثيل في الوجود

فبعد شويه الظروف بتتغير أو النضج بيختلف أو بيزهقو أو هو بيطلع مش كويس أو بيغير رأيه

طيب يحصل ايه للبنت ؟؟ بتتكسر وبتتوجع

اذا كان الشباب بيتوجعو

يعني اذا كان الولد لما بتحصل حاجه زي كده هو نفسه بيتعب وبيتعذب

فما بالكم البنت يحصلها ايه ؟؟

أتاري ربنا من كتر حرصه على قلبك مش عايزك تتكسري ، الكسره بتبقى موجعه

والعذاب بيبقى مؤلم

فليه ؟؟ ليه عذابك في كده ؟؟ ليه الارهاق النفسي والعاطفي .. الي هو أشد مليون مره من الارهاق البدني

ارهاق العاطفه .. ليه ترهق العاطفه بعلاقه والعلاقه دي تبوظ ؟؟

هي الفكره ايه ..... ؟؟

احنا عايزين نحافظ على قلبك ، بلاش القلب ده يتعذب

من فضلك .. خليها جوه مؤسسة الجواز بدل ما تتعب وبدل ما تتعبي

ده 90 او 99 % مش بينتهي بالجواز يعني 99 % من البنات بيتألمو وبيتعبو

فحرام عليكم

بلاش كده

ربنا عملها خوف عليكم مش أكتر

ومش كده وبس .. ده فيه مشكله تانيه .. ايه المشكله التانيه ؟؟؟؟

هنشوف المره الجايه علشان كده انا طولت اوي


سلام عليكم

٩ يناير ٢٠١١

عايز أصاحب !!! (2)


 


السلام عليكم ورحمة الله وبركاته

نكمل في موضوعنا اللي فات

وقفنا المره اللي فاتت عند

الصحوبيه .. هي حلال ولا حرام ؟؟

وقولنا اه طبعا حرام بنص القرآن

هي الصحوبيه موجوده في القران ؟؟

اه الصحوبيه موجوده في القرآن

موجوده مرتين .. مره للستات ومره للرجاله

طب ليه حرام ؟؟ هي العاطفه دي مش ربنا خلقها فيا ؟؟ يعني هو انا الي حطيتها ف نفسي ؟؟

هو انا فايدي اتحكم في مشاعري؟؟ ليه يارب ..

يعني ليه الاسلام بيضغط علينا ف حاجه .. هي حاجه جميله جدا ؟؟ ليه الاسلام بيضغط علينا في الناحيه دي

هو انا مش عاوزة ابدأ بقال الله وقال الرسول فتبقى هي حرام .. وهو الصح اني اقول كده

انما انا بكلم الشباب .. فخلينا نتكلم بالراحه وبعدين في الاخر نقول قال الله وقال الرسول

تعالو نبدأ بايه ؟؟؟؟؟؟

تعالو نشوف الصحوبيه دي ايه أسبابها وايه دوافعها ؟؟

هنلاقي ان الاسباب هي كالآتي :

الحاجه للحنان والحب

التطور .. اه ماهي الدنيا بتتقدم وانا عاوز اواكب العصر

الضغوط والتفكك الاسري

الفراغ والتسليه

صعوبه الزواج .. فأعيش قصه حب لغايه ماجي اتجوز

ممكن للولد علشان يثبت رجولته .. يعني زي ماالاولاد التانيين عاملين وبردو للبنت انا مش معقده لان هيتقال عليا معقده لو مش صاحبت

حب الاستطلاع والرغبه في التجربه

الافلام والاعلانات كلها مليانه قصص حب

القدوة السيئه .. لما واحده تشوف اخوها مصاحب .. طب ليه حرام عليها ؟؟؟

في استطلاع رأي اتعمل على أحد المواقع من مده

في رأيك كشاب .. ماهي دوافع الصحوبيه ؟؟

دخل عليه 4045 شاب

وكانت النتيجه :

الفراغ وتسلية الوقت 32%

الحب 12%

الزواج 9%

الغرائز 38%

أخرى 8%


ونفس الموضوع للبنات

في رأيك كفتاه .. ماهي دوافع الصحوبيه ؟؟

وصوت عليه 4630 بنت

وكانت النتيجه  :

الفراغ وتسليه الوقت 33%

الزواج 22%

الحب 19%

الغرائز 11%

أخرى 12%

والمفجأه ان الجميع كان متوقع ان النسبه عند البنات في الزواج والحب تكون 99%

لكن طلع ان الفراغ وتسليه الوقت 33% ودي نسبه تخوف

آدي الاسباب .. آدي الدوافع .. وانا كلامي هيكون اكتر للبنات

شوفتي .. دوافعه غير دوافعك خالص .. شوفتي الفراغ كام والغريزه كام ؟؟؟

افتكري النسبه دي كويس وفكري فيها

طيب .. شوفنا الاسباب وشوفنا الدوافع

نرجع بقى .. ليه الصحوبيه حرام وليه ربنا قال انها حرام ؟؟

تعالو نشوف نتائج الصحوبيه

أقولكم نتائج الصحوبيه ايه ؟؟؟

تعالو نسأل نفسنا سؤال ...

اذا كان الدافع من الصحوبيه هو الزواج . كم % من قصص الحب بتنتهي بالزاوج ؟؟؟؟

جاوبو على السؤال ..

وهو ده الي هنقوله المره الجايه ان شاء الله علشان انا كده طولت عليكم اوي

ولغايه المره الجايه .. استودعكم الله الذي لاتضيع ودائعه

يتبع  ..................


ده لينك الجزء الاول للي مش تابع من الاول

٧ يناير ٢٠١١

عايز أصاحب !!! (1)








أنا هتكلم النهارده عن مشكله من مشاكل الشباب قبل الجواز

مشكله أساسيه ، لها علاقه بالبيوت بعد الجواز والحب بالجواز

بنتكلم على ايه ؟؟ مشكله بيعاني منها الشباب

المشكله دي هي المصاحبه ... الحب

أنا عايز أحس بحب وعايز يبقالي واحده أحبها وتحبني ، ويكون بينا وبين بعض علاقه

أنا عايز أصاحب ..

تعالو نشوف مع بعض العلاقه دي هيكون شكلها ايه ؟؟ وعاوزين نقول للشباب عنها ايه !!

الاول تعالو نعرف علشان نبقى متفقين مع بعض .. يعني ايه صحوبيه ؟؟

يعني هي زميلتي في الجامعه ، في نفس الصف ،

أو هي معايا في الشغل ولازم نشتغل مع بعض علشان المدير قالنا لازم نشتغل سوا ؟؟؟

لا يا جماعه ده موضوع تاني

ان ظروف الشغل اقتضت اننا نشتغل ونتكلم مع بعض كتير ؟؟؟

لا مش ده الي انا بتكلم عنه .. أنا بتكلم عن حاجه تانيه

أنا مش بتكلم عن زماله احنا محطوطين فيها ، أنا بتكلم عن صحوبيه

وأقصد ايه بالصحوبيه ؟؟

هي ببساطه كده .. يعني أنا عندي 18 سنه وهي عندها 16 سنه

أنا عندي 20 سنه وهي عندها 17 سنه ، واحنا الحقيقه بنحب بعض جدا ، ومنقدرش نعيش من غير بعض

وهو الحقيقه أغلى حاجه في حياتي ، وأنا متخيلش الدنيا من غيره

واحنا ان شاء الله طبعا هنتجوز ، آه اكيد .. احنا منرضاش أبدا ان احنا نعمل العلاقه دي كده في الهوا

احنا عاوزين نتجوز ان شاء الله بعد عشر سنين كده

أما يبقا هو قادر ع الجواز وأبقا أنا قادره ع الجواز

هنتجوز ان شاء الله لما يكون هو جاهز واحنا ان شاء الله اتفقنا على كده

وأنا الحقيقه بعتبره هو كل حاجه في حياتي وهو بيعتبرني كل حاجه في حياته

واحنا بنتقابل بقا وعايشين حياتنا مع بعض ، أنا الحقيقه بعتبره زي ما يكون خطيبي بالظبط

ده كده يعني توصيف بسيط لحاجات كتيره أوي موجوده عند الشباب ، يا اما شباب وبنات مش عارفين يعملوها لكن بيتمنوها

طب العلاقه دي بتنشأ ازاي وفين ؟؟

هي الحقيقه أكتر مكان بتنشأ فيه الجامعه ، أو المدرسه أو الدروس الخصوصيه

يعني كلها الحمدلله في مجال العلم .. وده من الطرائف .. ان الحاجه الاساسيه الي بتنشأ فيها الصحوبيه هي المؤسسه التعليميه

طب وبتنشأ فين تاني ؟؟

في المصايف ، في المولات وفي النادي ، وبتنشأ بطريقه قديمه هي عباره عن التليفون اللي اتطور دلوقت وبقا الشات

ودي بقت طريقه سهله وبسيطه ومفيش عليها اي رقابه

طب هي الصحوبيه .. نشأت بقالها أد ايه ؟؟ يعني هل هي ظاهره طبيعيه أصليه ، ولا هي ظاهره جديده ؟؟

لاهي في الواقع ظاهره جديده نشأت في اخر 60 سنه بس

يعني في الاربعينيات مكانش في حاجه اسمها صحوبيه ، لان النسا مكانتش محتاجاها

طب هي الصحوبيه حلال ولا حرام ؟؟

يعني بعد المقدمه دي .. من الاخر كده .. الصحوبيه حلال ولا حرام ؟؟

لأ .. الصحوبيه حرام طبعا

طبعا حرام !! 

ليه طبعا حرام ؟؟؟

دي طبعا حرام .. بنص القرآن

هي الصحوبيه موجوده في القرآن ؟؟؟

آه موجوده في القرآن .. مرتين .. مره للستات ومره للرجاله



يتبع ........