">

">

ايه رأيك في مدونتي ؟؟ علشان تعرفو أنا أد ايه متواضعه !!

ايه رأيك في مدونتي .."علشان تعرفو أنا أد ايه متواضعه"


هنا يكف قلمي عن النزيف .. هنا يتجدد جرح جديد .. ليبقى جرح حاول الكثير منا كتمه .. لكنه أعلن الانهيار .. وفاض على دنيا المحال .. كان الأمل في تلك القافلة الراحله .. وقد ذهب .. وترك بقايا رماد انسان انتهى به الزمن .. فكلها في النهايه آلام تسكن دواخلنا تلتحفنا تارة ونلتحفها تارة .. ندفنها في لحد وندفن معها .. ولكن الألم يولد في القلوب الوفيه .. ويموت في قلوب الخائنين .. وهذه هي الحياة .. فصول قد تبدأ بفرح .. وتنتهي بألم .. ولكن هناك أشخاص .. كل فصولهم ألم .. معادلة سهلة الحل .. صعبة النتيجه ..

لـــظــــــروف خـــارجــــه عن ارادتــــي التعليقـــــــــات بـــــقــت فــــــووووووووووووق

28 نوفمبر، 2010

حته منك ..





بسم الله والحمدلله والصلاة والسلام على رسول الله

(صلى الله عليه وسلم)

سعادة البيوت .. مسؤلية الراجل .. وكمان الست

وأنا لو حبيت أكلم الزوج النهارده

هقوله .. افتكر معايا يوم ما ربنا عز وجل .. خلق سيدنا آدم من التراب

وخلق حواء .. حته من سيدنا آدم .. من ضلعه

علشان تحن ليه دايما

فأنا بفكرك يا زوج .. ان الزوجه انت عامل زي بلدها .. الوطن بتاعها

هي تحب تأوي اليك .. وتحن اليك

فالست ربنا خلقها الراجل هو أهم حاجه في حياتها .. الست السويه الطبيعيه

فخد بالك .. اذا كان ربنا خلقها بتحب تحن ليك .. خليك حنين

علشان ربنا خلقها .. انت ملجأها .. وانت سندها .. وانت ظهرها ..

وعزتها وسعادتها انت سببها الكبير في الدنيا دي

فخليك حنين على مراتك ..

وأكتر حاجه الست تحبها .. هي الكلمه الحلوة

علشان كده ربنا قال " وقل لعبادي يقولو التي هي أحسن "

خلي كلمتك حلوة .. والكلمه الحلوة دي تسوى مال الدنيا كله عند الست

عارف لو كان ربنا مش مقدرك على رزق واسع .. وهدايا كتير .. وعطايا كتير .. وده قدَرَك

كلمتك الحلوة بالدنيا عندها

علشان كده .. حاول انك انت تكون حنين على الحاجه اللي ربنا خلقها حته منك .. وهي مراتك .. وخليك كريم

أقولك معلومه حلوة .. لو أنفقت مالك في الجهاد أو اشتريت العبيد وأعتقتهم في سبيل الله  او تصدقت للمساكين او انفقت على مراتك

عارف الاربع أوجه في الانفاق دول .. أعظمها أجرا كما قال صلى الله عليه وسلم :" دينار أنفقته في سبيل الله (في الجهاد) ودينار تصدقت به على مسكين ودينار أعتقت به رقبه ودينار انفقته على أهلك (يعني مراتك) أعظمها أجرا عند الله .. الذي انفقته على أهلك"

ابسط مراتك .. ووسع عليها ..وحن عليها .. واكرمها .. لانها حته منك

..................................................................


ولنا لقاء جديد ان شاء الله

22 نوفمبر، 2010

سامحني ..





يارب انت اللي بس رحيم

بــلــم همومي واشكــيلك

عشان عارفك تملي كريم

بمد ايديــــا وادعيــــــلك


سامــــحني لأني عبد ضـعيف

متــــــاع الدنيا آه شغــــــلني

نــــسيـــت الآخــره والجــنه

نسيت وندمت فوقت وجيـت

وطمـعان نفسي ترحمــــني

وبعد ده ايـــه انـــا اتـــمنـى


طمعان كمان على نفسي قويني وتهديني لرضاك

ويكون كمان طه الامين هو الشفيع ســاعة لقاك

دمعي كتير لكن هيبقى أد ايه جـــنــب الذنــــوب

ندمان كتـــيـــر وبقلبي جاي وعايــز اتـــــــوب


سامــــحني لأني عبد ضـعيف

متــــــاع الدنيا آه شغــــــلني

نــــسيـــت الآخــره والجــنه

نسيت وندمت فوقت وجيـت

وطمـعان نفسي ترحمــــني

وبعد ده ايـــه انـــا اتـــمنـى


.......................................................................................

سأغيب لمده .. قصيره ان شاء الله

 

20 نوفمبر، 2010








امبارح .. كنت في فرح واحده صاحبتي

روحت وأخدت معايا أختى منى

ودخلنا وقعدنا والعروسه لسه مجاتش

المووووووووووووووووووووووهم

كل الاطفال في الفرح كعادتهم طبعا جايبين شيبسي وعصير

منى قالتلي يا أبله مروة أنا عاوزة شيبسي

أحرم البنت من حاجه !!!! طبعا لالا

أقوم من أدام كل الناس دي وأطلع !!! طبعا مستحيل

أووووووووم ايييييييييييييه

قررت اني انقي أكتر ولد بيروح يجيب حاجات لاخواته ويجي واقوله يجيبلها

ولأني مش كنت لابسه النظاره فكان كل الناس شكل بعضها

لغايه مالقيت ولد شكل التيشيرت بتاعه مألوف يعني

ناديتله وقولتله تعرف تروح تجيب شيبسي للبنوته دي ؟؟

قالي آآآآه

اديته 5 جنيه وقولتله هتعرف ترجع ؟؟ قالي آآآه

كل الأولاد تروح وتجيب وتيجي الا ده

راح مجاش واااااااااااااااااء

المشكله مش كده

المشكله اني لما وقفته .. قالي هي العروسه من عيلة ايه ؟؟ قولتله

قالي والعريس ؟؟ قولتله معرفش .. انت مش تبع الفرح ولا ايه ؟؟

قالي لا انا بس مش عارف احنا في القاعه دي ولا اللي فوق !!!!!!!

وأنا بديله الفلوس أصلا كنت عارفه انه مش جاي تاني

حتى منى كانت بتبص وراها كل شويه عليه

أقولها متبصيش ياحبيبتي .. هو مش جاي تاني خلاص .. ماهو أصله رزق الهبل ع المجانين

وكنت بكلم الدكتور هيثم ساعتها .. فبقوله هو شكله مش تبع الفرح تقريبا !!

قالي : ههههههههههه لا انتي اللي مش تبع الدنيا


يلا .. أعيش و اخد غيرها


كل سنه وانتم طيبين واااااااااااااااااااااااااااء

15 نوفمبر، 2010

دمعي يكفي ... ؟؟؟





دمعي يكفي
علشان أوفي
وعنيا يتوبو
ولو قلبي

لسه ينفع
أخليه يرجع
عن طريقه
يـــــاربي

و يميني يمسك كتابي
قرآن يشفعلي في حسابي
يارب ارحمني في عذابي
بـــــــــرحمتك

وأقول لكل الناس
وأكون فرحان
أنا اتغيرت
ولسه كمان

ويميني يمسك كتابي
قرآن يشفعلي في حسابي
يارب ارحمني في عذابي
بـــــــــرحمتك

 

ياربنا لك الحمد كما ينبغي لجلال وجهك وعظيم سلطانك

ياربي لك الحمد كله ولك الشكر كله واليك يرجع الامر كله

اللهم لك الحمد أنت ملك السموات والأرض ومن فيهن
ولك الحمد أنت نور السموات والأرض ومن فيهن
ولك الحمد أنت قيوم السموات والأرض ومن فيهن

ولك الحمد أنت حق ووعدك حق ولقاؤك حق والجنة حق والنار حق والساعة حق والنبيون حق

ومحمد صلى الله عليه وسلم حق

اللهم صلى على سيدنا محمد في الأولين
صلي على سيدنا محمد في الآخرين
صلي عليه في الملأ الأعلى الى يوم الدين
اللهم صلي على النبي المصطفى في كل يوم وفي كل وقت وحين

اجمع بيننا وبينه كما آمنا به ولم نره



كل سنه وانتم طيبين

13 نوفمبر، 2010

يــــــــارب

7 نوفمبر، 2010







بسم الله والحمد لله والصلاة والسلام على سيدنا محمد (عليه الصلاه والسلام )



من اكبر الحالات الي الانسان بيعدي بيها في حياته ، ويبقى ضعيف أدام الشيطان

قالو : 3 حالات

- وقت مايكون متنرفز جدا

- وقت مايكون في شهوه بتعرض عليه

- أو وقت مايكون في شبهه هو مش عارف يعمل فيها ايه

ساعتها الشيطان يقوله : اتصرف بالطريقه الغلط

وقت ما يكون غضبان ، وقت استثارة الشهوة عنده ، وقت ما يكون في شبهه مش عارف يتصرف ازاي .

والغضب من أكتر الأوقات الي الانسان فيها الشيطان بيدفعه تجاه التصرفات الي يندم عليها .

كتير من الأوقات .. الانسان لما حد بيغلط في حقه او ينتقص منه بيستثار وبيغضب ، والغضب قالوا ان هو فرع من فروع شجرة الكبر

لما الانسان يكون حاسس بنفسه ، و شايف ان نفسه عاليه جدا ، أي حد ينتقص منه في أي حاجه ، أو يهزر معاه هزار ، 

 هو شايف ان ده انتقاص من نفسه العاليه أوي ، وساعتها الانسان ده بيغضب .

وخلينا نقول ان احنا علشان منغضبش لازم نبص لكل الاحداث الي بتحصل في الدنيا انها من قدر الله

وانت ماشي بالعربيه ، واحد كسر عليك .. معلش ، انت عارف ان أخلاق الناس فتنه " وجعلنا بعضكم لبعض فتنه . أتصبرون "

معلش  انت النهارده صايم ، أو حتى مش صايم ، لعله مأخدش باله ، طب لعله هو انسان مش مهذب أوواخد السواقه عافيه ، واخدها بالعنف كده علشان يسبق الناس .. قول معلش .. أنا هسامحه لله ، علشان في يوم من الايام لما أغلط ، ربنا يخلي الناس تسامحني وهو كمان يسامحني ، لعله بيديني طبق مليان بالحسنات يتقل بيه ميزان حسناتي كأنه هديه ليا منه

خد بالك الي بيغلط فيك وانت متغضبش  انت يوم القيامه تاخد من حسناته  أو في يوم من الايام هتغلط في حق حد ، فربنا يحنن قلبه زي مانت كنت حنين وسامحت هذا الانسان ومغضبتش

" يا ابن آدم .. اذكرني حين تغضب .. اذكرك حين أغضب "

افتكر ربنا وقت ما تتنرفز ، ربنا عز وجل  ميغضبش عليك وقت ما تكون انت غلطان وتستحق غضب ربنا سبحانه وتعالى

في يوم من الايام عمر بن عبد العزيز (أميرالمؤمنين والخليفه العظيم)  معدي في المسجد والدنيا كانت ضلمه ،فغصب عنه داس على ايد واحد كان نايم في المسجد ، فصحي هذا الانسان ومكنش يعرف ان ده عمر بن عبد العزيز امام المسلمين وخليفة المسلمين 

 فقال له : أنت أعمى ؟؟؟؟؟؟

(تخيل كده ملك من الملوك العظام حواليه الخدم والحرس بتوعه وواحد بيقوله يا اعمي !! )

فقال عمر بن عبد العزيز : لا .. ( أنا مش أعمي ) .. ثم انصرف

هو شاف ان الشتيمه دي حسنات جاياله ، وملك نفسه

" ليس الشديد بالصرعه (مش القوي الي يعرف يضرب الناس ويوقعهم ) انما الشديد من يملك نفسه عند الغضب "


ربنا يرزقنا الهدايه .. اللهم انا نسألك حبك وحب من أحبك وحب كل عمل يقربنا الى حبك ..

 كل سنه وانتم طيبين


ولنــــــــــــــا لـقـــــــــــاء جديـــــــــــــد ان شــــــــــــــــــــاء الله

3 نوفمبر، 2010

عبقرية الغباء ..






وللغــبـــــــــــاء فــــنــــــــــون



............................................

يسألونها إذا ما استطاعت أن تعيش للأبد فهل تقبل ؟.. ولماذا ؟ الإجابة: لن أعيش للأبد لأنه لا يجدر بنا أن نعيش للأبد .. لأنه لو عشنا للأبد فلسوف نعيش للأبد.. لكن ليس بوسعنا أن نعيش للأبد لهذا لن نعيش للأبد

مس ألاباما التي صارت ملكة جمال أمريكا عام 1995



**********

التدخين يقتل ..وإذا أنت قُتلت فقد فقدت جزءًا مهمًا فعلاً من حياتك


النجمة بروك شيلدز في حملة فيدرالية لمنع التدخين

**********

لم يسبق لي أن أجريت جراحة ركبة في أي جزء آخر من جسدي

ونستون بنيت – لاعب كرة سلة

**********


فيما عدا جرائم القتل، تظل واشنطن تتمتع بأقل معدل جريمة في البلاد

عمدة واشنطن ماريون باري


**********
لن أترك مجموعة صحفيين ينبشون في أوراقنا .. فنحن رئيس الجمهورية


هيلاري كلنتون


**********

هذا الوغد المنحط يستحق أن يركله جحش حتى الموت ، وأنا الرجل القادر على القيام بهذا العمل

مرشح انتخابات في تكساس

***************


ليس التلوث هو ما يؤذي البيئة، بل ما يفعل ذلك هو الشوائب في الهواء والماء

آل جور – نائب الرئيس كلنتون

 **************

" نحن نتأهب لحادث غير متوقع، قد يحدث أو لا يحدث"

آل جور – نائب الرئيس كلنتون


**********

كلمة (عبقري) لا تنطبق على كرة القدم .. العبقري هو شخص مثل نورمان أينشتاين
جو ثيسمان – محلل رياضي

**********

"نحن لا نفرق بين الناس ! .. فقط نحن نستبعد نوعًا بذاته من البشر "

كولونيل جيرالد ولمان - مدرب في الجيش

**********

" لو لم ننجح فنحن نجازف بالفشل"

بيل كلنتون
**********

"عادة تأتي أغلب واردات أستراليا مما وراء البحار "

كيبل اندبيري
************************

سوف تتوقف كوبونات الطعام الخاصة بك بدءًا من مارس 1992 لأننا تلقينا مذكرة تقول إنك توفيت. ليرحمك الله. يمكنك تقديم طلب ثان في حالة تغير ظروفك


إدارة التموين – جرينفيل – ساوث كارولينا



16 أكتوبر، 2010



بسم الله والحمد لله والصلاة والسلام على رسول الله صلى الله عليه وسلم

.............................

 
بعتذر عن غلق التعلقات في البوست الي فات







عرض الانسان كبير عند ربنا

عرض الانسان يعني سمعته يعني شرفه يعني شخصيته يعني صفاته لو هتتكلم عليه

اوعى تتكلم عليه في ظهره علشان ربنا شايف وسامع " اني معكما أسمع وأرى"

وفاكرين ؟؟؟ البني آدم ده المسلم زي الكعبه

والنبي عليه الصلاة والسلام  قال " ألا ان دمائكم وأموالكم وأعراضكم حرام عليكم كحرمة يومكم هذا في شهركم هذا في بلدك هذا "

وكان في مكه

يعني حُرمة المسلم زي حُرمة الكعبه زي حُرمه الحرم

عمرك شوفت قبل كده حد بيسئ بلسانه للكعبه هذا المقدس الشريف عند ربنا سبحانه وتعالى

والغيبه : هي انك تتكلم عن حد في ظهره " ذكرك أخاك بما يكره"  بشئ هو فيه

بعض الناس فاكر ان الغيبه ان أنا أظلم واحد وأدعي عليه بحاجه هيه مش فيه

لأ

انك تقول على انسان صفه مش كويسه حتى لو هيه فيه لو سمعها على نفسه تضايقه هي دي الغيبه

"قيل يا رسول الله : وان كان فيه "

ان كانت فيه الحاجه الوحشه دي

"قال : وان كانت فيه فقد اغتبته"

هي دي الغيبه ، من الكبائر عند العلماء

" وان لم تكن فيه فقد بهتته " يعني ظلمته وافتريت عليه

مش عايزين نتكلم على حد يا جماعه أي كلام سلبي

أي انسان بيذكر واحنا قاعدين يا بنتكلم عليه كلام ايجابي يا اما كلام سلبي

يعني يا بنشكر فيه يا بنذم فيه

فلو انت قاعد في قعده حد اتكلم على حد بكلام مش كويس عندك 3 اختيارات يا اما كأنك مشترك معاهم في الذنب :

- اما تقولهم يا جماعه حرام مينفعش نتكلم على حد في ظهره كلام زي ده

- أو اما انك تدافع عنه وتقول صفات عكس الي فيه وتشهدله بالخير

- واما انك انت تغير الموضوع ده وتدخلهم في موضوع تاني بحيث انكم تتكلمو في حاجه تانيه متاخدوش فيها سيئات

يا اما لازم تسيب المكان الي فيه هذه الكبيره لان ربنا مدام سامع وشايف لازم نوقر ونحترم رؤيه وسمع رب العالمين سبحانه وتعالى

لو كنت غلطت في حق حد في يوم من الايام في ظهره

استسمحه

ولو حاسس ان انت متقدرش تعتذرله وتستسمحه يبقى ادعيله

وروح أدام نفس الناس الي انت اغتبته قدامهم وقول فيه كلام كويس لعلك تصلح ما أفسدت

.............................................................

ولنا لقاء جديد





13 أكتوبر، 2010

نــفـــســـي ...





نفـســـي أعــيــش في يــوم مطــمـنـــه ..

نفسي فـي لحظه أعـيـشــها وأكـون أنا ..

أيوة خايفه يـجي بـكره .. وأبقى بالنســبه له ذكرى ..

أيـوة خـــوفي أنــا عايـــشــه فــيـه مســتــســلـمـه ..


خايــفـه ضعــيـفـه يـــعـنـي أنا هـعــمـل ايه ..

حـاجـه مـــخـيـفـه .. ده الي بـحـس بــيـــه ..

حــاجـــه فـــيــــا مـــــــن زمــــــــــــــان ..

عــــمــــري مـــــا بـــــحــــس بــــأمـــــان ..

عــــمـري ما اتـحـقـقلي حـلم حلــمـت بــيـه ..


آآه أنـــا عـــايــــزة قــلـبــي يـــعــيــش وحــيـــــد ..

حــــــابــــه انـي افــــــضـــل مـــــــن بـــعــيــــــد ..

مــش عـايـزة أعــيــش مع نــاس بتـخدع بعضها ..

لــــواحـــدي في حـــضــنـــي أحــــــســــــــــــــن ..

مـــســـتــحــيـــــل فـي حــــد يــــــــحـــضـــــــن ..

عــــــمـــري مــا مـــشــيــت سـكه ليـا في ضيها ..



عــمـــري مــاخـدت حـاجــه بــحــبــها ..

حـتــى الـــفـــرحـه خــايــفـــه مـنـــــها ..

خــايـــــفـه تــــطـلـع مـــش حــقــيـــقـه ..

وأنـدفــع وأعـــمــل جــــــريـــــئــــــه ..

وأتــوجـع .. مـنـا قــلـبي آآه مـش أدهـا ..



خايــفـه ضــعــيــفـه يــعـــني أنـا هـعــمـل ايــه ..

حـــاجــه مـــخــيـفــه .. ده الــي بــحـس بـــيـه ..

حــاجـــه فـــيــــا مـــــــن زمــــــــــــــــــــــــان ..

عــــمـــــــــــري مـــــــا بـــحــــس بــــأمـــــان ..

عــــمـــري ما اتــحـقـقـلي حـــلم حلــمـت بــيـه ..

9 أكتوبر، 2010







من أعلى مقامات العبوديه


وأكثر الحالات اللي الانسان بيكون فيها قريب من ربنا


انه يستشعر ان ربنا شايفه

ويبقى عايش هو كمان وكأنه حاسس بقرب ربنا

" أن تعبد الله كأنك تراه , فان لم تكن تراه فانه يراك " 

واحنا لازم نغير مفهومنا عن اتقان أعمالنا

سواء كنا موظفين ، أو شباب طلبه في الجامعه بيذاكرو

ولازم نغير مفهومنا عن الاتقان ان انا بشتغل عند الناس

واني بقبض من ايد مديري أو ايد الناس

أنا مبشتغلش في الكون ده الا عند ملك واحد هو اللي بيملك كل شىء

هــــــــــو ربــــــــــــنـــــــــــا

هو اللي بيملك كل الكون ده بما فيه من شركات ومصانع

الله

هو الرزاق ، هو مالك الملك

فلما تكون شغال في ملك ربنا وهو شايفك اتقن

اتقن لان ربنا سبحانه وتعالى من صفاته انه بيتقن

" الذي أحسن كل شىء خلقه "

" صنع الله الذي أتقن كل شىء خلقه "

فخد بالك .. باللغه المصريه البسيطه .. الانسان اللي بيكروت الشغل

الانسان اللي مش بيشتغل بقلبه ، الانسان اللي بيضيع وقت أثناء الشغل

الانسان اللي بيتأخر عن الشغل

خد بالك .. أحسن يكون مشكوك في مالك حلال ولا مش حلال

الشباب اللي في الكليات ، اللي قرب يدخل الكليه

خد بالك .. مذاكرتك دي عباده ، زي الصلاه

ومتفرقش لو احنا هنطلق بقى في حاجه اسمها "سجاده الصلاه"

واقفين بين يدي الله بنعبده

في حاجه اسمها "سجادة المذاكره"

انا قاعد كأني بعبد ربنا سبحانه وتعالى وأنا قاعد على الكمبيوتر بخلص حاجه

وأنا قاعد بذاكر وبكتب حاجه

اتقن شغلك .. وربنا سبحانه وتعالى حابب ان المسلمين حابب ان الصالحين

حابب ان الناس الطيبين الي بيحبوه وبيعبدوه هما الي يكونو بيعمرو أرضه بالاخلاق

علشان كده يا جماعه .. مش عاوزين نكون احنا الامم المتخلفه بسبب ان احنا فاكرين 

ان عبادة ربنا تتلخص في بعض الاذكار بس

يلا نتقن أعمالنا 

ومقامك حيث أقامك ..

شوف ربنا شغلك ايه .. أو شوف ربنا وظفك فايه

ويبقى هو ده الباب الي تدخل منه الى الله باعمارك للأرض




مقامك حيث أقامك ..

اتقن شغلك .. حلل لقمة عيشك .. ذاكر كويس

علشان تبقى انت بكره المهندس أو الدكتور الي يعالج الناس

علشان تاخد ثواب كبير أوي باعمارك للكون

....................................................................................

ولنا لقاء جديد

1 أكتوبر، 2010

 
 
 
 
 
بسم الله والحمد لله والصلاة والسلام على رسول الله صلى الله عليه وسلم 
 

قبل البوست ردي على الجميله sweet violet الي سألت
على ان جدد حياتك دي كانت المدونه التانيه

الحقيقه يا سويت انا فعلا عملت المدونه التانيه دي لكن مش لقيت
عليها اقبال كتير وده لسبب بسيط ان معظم الناس بترد الزياره بس
انما مش بتكون مهتمه تقرأ وتدور على المعلومه

قولت أنشرهم هنا ولو روحتى قارنتي ال2 الي فاتو هنا وهناك
هتلاحظي فرق عدد التعليقات
والي يهمني ان الناس تقرأ وتشوف حتى لو مش حد علق
المهم ان الكلام ده يتقرأ ويبان ويبقى فيه نسبه متابعه

نروح للبوست بقى


 
من الاخلاق الجميله الي ربنا يحب اننا نعامل بعض بيها

خلق صعب على كتير مننا لكنه مقياس للايمان وحب ربنا

الخلق ده تعريفه هو حب الخير للغير

الخلق ده اسمه " الايثار"

ان انا احب الخير لغيري وافضل غيري على نفسي او على الاقل احب الخير لغيري زي ما احبه لنفسي

فاكرين حديث النبي صلى الله عليه وسلم " لايؤمن احدكم حتى يحب لاخيه ما يحب لنفسه"

البني ادم يا جماعه ربنا خلقه بيحب التملك وبيحب نفسه وبيحب الخير لنفسه

فلما الانسان يطلع من الصفه دي لصفه تانيه جميله صفه نبويه

ان النبي كان بيحب الخير لغيره ودايما كتير كان بيضحي علشان غيره

صفه مش سهله لكنها بترفع الانسان جدا عند ربنا

وزي مانت هتفضل غيرك على نفسك ربنا سبحانه وتعالى هيفضلك على الناس

ويرزقك برزق خاص علشان خاطرك انت علشان انت بتحب الخير لخلقه

السيده "عائشه" يوم ما اندفنت عارفين اندفنت فين؟؟

كانت ممكن تندفن في بيتها جنب زوجها النبي صلى الله عليه وسلم وأبوها أبوبكر الصديق

لكن قبل موتها بفتره يوم ما اتقتل سيدنا "عمر بن الخطاب" بعت ابنه "عبد الله " قاله وهو خلاص في الرمق الاخير

 قاله :  استأذن "عائشه" نفسي اندفن جنب صاحبي" أبوبكر"  و النبي  صلى الله عليه وسلم 

في بيت السيده عائشه

انتو عارفين النبي مدفون في بيته بيت السيده عائشه

فراح "عبد الله"  يقولها يا عائشه "عمر بن الخطاب"  أبويا بيقولك نفسي اندفن جنب "ابوبكر"  صاحبي و" النبي"  حبيبي

فقالت : أنا كنت محضره المكان الفاضي " لقد كنت أخبئه لنفسي " كنت محضره المكان ده علشان اندفن جنب زوجي النبي وجنب ابويا
أبوبكر الصديق

"ولكني ساؤثر به عمر" يعني هفضل عمر على نفسي

ويروح يبشر سيدنا "عمر" مبروك "عائشه" وافقت

لكن يا "عائشه" حتى لو مش مدفونه جنب النبي انتي فضلتي عمر على نفسك في الآخره

فأكيد قبرك من أحلى قبور الناس يا أم المؤمنين

ربنا مبيضيعش عنده الاحسان

ربنا بيحب الايثار

يلا نفضل بعض على نفسنا

أو على الاقل نحب الخير لغيرنا زي مانحبه لنفسنا

" لايؤمن أحدكم حتى يحب لأخيه ما يحب لنفسه "


.........................................................................................................................



ولنا لقاء جديد ان شاء الله

29 سبتمبر، 2010

الحمدلله







 

بسم الله والحمدلله والصلاة والسلام على رسول الله صلى الله عليه وسلم




 
تخيل لو ملك من ملوك البلاد وكان عامل عيد ميلاد 

وواحد من الرعيه جابله باكو بسكويت صغير كده ممكن يكون بربع جنيه

فياخد الملك البسكويت الصغير ده ويفرح قوي

ويقول للشخص البسيط انت جايبلي الهديه الكبيره دي ، كل ده علشاني ؟؟

فيقوله أنا مجبتلكش حاجه ، دي حاجه على أدي ، دي بسيطه قوي 

فيقوله الملك الغني : هي ممكن تكون بسيطه لكن علشان أنا بحبك وانت غالي عندي ، دي كبيره قوي في عنيا 

ولله المثل الأعلى 

احنا منعرفش يا جماعه حد بيرضى بالقليل مننا زي ربنا سبحانه وتعالي 

أقل حاجه ترضيه وأقل حاجه تفرحه

بل ان ربنا بيضحك ، زي ما النبي قال (صلى الله عليه وسلم ) : ان ممكن ركعتين يبقى واحد تعبان وراجع من شغله كما في الحديث

ان كان فيه ناس مسافره  وضربو الخيام يعني بدأو ينصبو الخيام علشان ينامو ، فقام شاب يتملق ربه بركعتين

يعني وقف كده يصلي ركعتين حب في ربنا فضحك الله له

انتو عارفين يا جماعه انه يكفي لربنا انه يرضى ان وحضرتك بتفطر تقول الحمدلله بعد الأكل أو بعد ما تشرب شربة الميه تقول الحمدلله

قال (صلى الله عليه وسلم ) كما في صحيح مسلم :" ان الله ليرضى عن العبد يأكل الأكله فيحمده عليا ويشرب الشربه فيحمده عليها "

ده كافي ان ربك حبيبك يرضى عنك ويسامحك ويغفرلك بكلمة الحمدلله

حد عارف ان من قال " سبحان الله وبحمده " مائه مره غفرت كل ذنوبه وان كانت مثل زبد البحر

زبد البحر يعني رغاوي البحر

كل ذنوبي ؟؟ علشان 3 دقايق بسبح بحمد ربنا !!

يا ما انت كريم يارب

ربنا بيحبك وعلشان بيحبك بيرضى بأي حاجه انت عملتها بقلب وبحب علشانه وبأقل حاجه

وزي مااتفقنا : يكفي كلمه الحمدلله لرضى رب العالمين سبحانه وتعالى 


ــــــــــــــــــــــــــــــــــــــــــــــــــــــــــــــــــــــــــــــــــــــــ


ولنا لقاء جديد ان شاء الله



26 سبتمبر، 2010


السلام عليكم ورحمة الله وبركاته
.....................................................






اولا حمدالله على سلامتي

وشكرا لكل الناس اللي وقفت معايا انا الحمدلله كويسه وزي القرده
وشكرا لغير المعرف اللي هو السبب في الي حصل ده كله
والله انا حاسه بسعاده مش ليها مثيل
وبعيش حاليا حاله رائعه من السلام النفسي
بس كده

---------------------------------------------------------


نشوف بقا اول حلقه من سلسله جدد حياتك




ربنا خلقنا في الحياه يا جماعه علشان نعبده وبس
" وما خلقت الجن والانس الا ليعبدون "

لكن مفهوم كلمة عبد أو عباده متنحصرش فقط في الصلاه او في بعض الاذكار والركعات

وان كان ده اصل الدين لأن الصلاه عماد الدين

لكن وما خلقت الجن والانس الا ليعبدون محتاجين نعرف ان عباده ربنا سبحانه وتعالى هي علاقه بينا وبين ربنا في الروحانيات

الصلاه والذكر والقرآن

وعلاقه بينا وبين الناس في الاخلاق والمعاملات

وعلاقه بينا وبين الارض يعني نعمر الارض

العلاقه بينا وبين ربنا الي فيها الصلاه كما قال "صلى الله عليه وسلم : أحب الاعمال الى الله اصلاه "

ولما اتسأل " أي الاعمال احب الى الله ، قال : الصلاه على وقتها "

فمينفعش انسان يا جماعه يكون مجتهد في شغله وأخلاقه حلوة ومش بيصلي

لازم اقل حاجه يكون بيصلي الصلوات الخمسه علشان ميكونش قاطع الصله بينه وبين ربنا سبحانه وتعالى

وفي نفس الوقت علشان بكون انسان متزن مينفعش يكون مُصلي وعلامه الصلاه في راسه زي مابنشوف ناس كتير

لكن الناس مبتحبوش بسبب ان اخلاقه مش كويسه

لما النبي اتسأل عن المسلم في الحديث الي احنا كلنا واحنا صغيرين كنا بنسمعه

" من المسلم يارسول الله قال : المسلم من سلم المسلمون من لسانه ويده " النبي دلوقت لخص يعني ايه شخص مسلم

ليك علاقه بربنا جميله في الصلاه بتقوله : يارب اكرمني وارضى عني وانت كمان ارضا يارب وارزقني ووسع عليا

تطلع من الصلاه وانت واقف كده مؤدب بين يدي الله بنفس الوقفه دي مؤدب بين يدي الناس

الي ربنا سبحانه وتعالى قالك اوعا تطلع من الدنيا دي وانت مزعل منهم حد

ومتنساش " لايؤمن احدكم حتى يحب لأخيه ما يحب لنفسه " ده الايمان و ده الاسلام

والحاجه الاخيره " هو الذي انشأكم من الارض واستعمركم فيها "

انت خليفه على هذه الارض انت شغال في الارض دي والارض دي ملك لربنا سبحانه وتعالى

فلو كنت طالب اتقن الحاجه الي بتعملها ، لو كنت موظف اوعى تكون مش بتحلل قرشك بسبب الكسل في رمضان

يلا نعبد ربنا سبحانه وتعالى ونصلي

يلا نعامل الناس بأخلاق المسلم من سلم المسلمون من لسانه ويده

يلا نتقن اعمالنا علشان نعمر هذا الكون الي ربنا استخلفنا عليه

ـــــــــــــــــــــــــــــــــــــــــــــــــــــــــــــــــــــــــــــــــ


ولنا لقاء جديد ان شاء الله

20 سبتمبر، 2010

الــيـــكــ ..

[80060534s07.jpg]


سأحـــزم حقائـــبي وأرحــــــــــل ..

وفــــي عينــــي دمـــــــعة ألـــــم ..
وكأني مقبلة على موت بلا أجل ..


 
سأرحل بقلب منكسر ..
ونفس حزينة بلا أمل ..


ارحـــلــــــــــــــي ..


كلمة ترددت على مسامعي مراراً .. فظننتها مزحة
ارحــــــلــــــــــي ..
قيلـــــــــــــــت لي بأعلى صــــــــــوت وجديـــــــــــة ..


نعم ياسيدي فقد قولتَـــــــــــــها قولا .. وأكدتها فعلاً ..
فغيابك المتــــــــعمد قد ســـــلب روحي وأعصـــابي ..
وترك سفني تتأرجح بين أمواج الشوق المتلاطمه ..
تتقاذفها الأسئله .. وتسيطر على دفتــــــها الحيره ..


 
وها أنا الآن يا عزيزي ......

قـــررت الـــرحــيل ..
نعم ... أنا راحــلـــــــــــــــــه ..


سأهرب عن كل الدنيا .. وأختفي بـلا أثر ..
عن عالم لم يسقني سوى جــرعات الندم ..
وحزن يتقطر بكل سخاء كالــــمطـــــــــر ..

سلام على الدنيــــــــــــا


عندما ينعدم الـــــــنــــــــظر ..
وتختلف الرؤى بين البشر ..
فتزور النفس جميع الفتـن ..


سلام على الدنيــــــــــــــــــا ..

عندما نبيع بثمن وبلا ثمن ..
ما لا يباع ولا يشترى في سوق القيم ..


سأرحل عن غرور الدنيا .. وأنزع رداء الحنين ..
عن عيون أذاقتني مر السنين
وتركتني لغربة نفسي .. يتلحفني صدى الأنين ..

اذاً ....
سمعاً سيدي وطاعةً
فــــســــــأرحـــــــل بــــلا عـــــــودة

12 سبتمبر، 2010







البوست الي فات زي ما معظم الناس عارفه كنت بتكلم فيه عن الشخصيات الي مش كويسه في عالم التدوين
الموضوع ده فات عليه اكتر من شهر وده لاني مش حبيت اكتب فيه خلال شهر رمضان

 
الجزء التاني من الموضوع انا عملته علشان ارد فيه على التعليقات واحد واحد ولو ان في تعليقات الرد عليها يحتاج بوست كامل

 
والي خلاني افكر في حكايه الرد دي هو اني لقيت الصورة مش كامله عند ناس كتير


بـــــــــــــــــــــســــــــــــــــــــم الله نـــــــــــبـــــــــــــــــــــــــــــــدأ


اولا

--------

 
بالنسبه لتوتا الي قالت انها عرفت الشخصيه الي انا قصدي عليها

 
انا مش هكذب واقول انك اكيد مش عرفتي لكن الاكيد ان المواصفات الي انا قولتها دي تنطبق على 3 من سيئي السمعه



وبكرر للمره المليون .. البوست مش للتشهير بحد البوست علشان محدش يزود علاقته بالمدون عن حدود المدونه ليس الا


ثانيا

-------

 
المدونه مش كفيله ابدا انها تبين شخصيه صاحبها بالعكس دي بترسم شخصيته زي ما هو حابب الناس تشوفها


ثالثا
--------

 
في ناس طلبت اني اعرفها تحديدا مين الناس دي بالاسم .. رفضي مش لأني رافضه المساعده .. بالعكس


الموضوع كله اني اخاف اقول اسم حد صريح ويكون انا غلطانه خاصة اني وضحت اني مش اتعاملت مع حد من الشخصيات دي بشكل شخصي


وكل الي اعرفه نتيجة تكرار الشكاوي من شخصيات معينه


رابعا

------

 
تعليق الاستاذ احمد الصعيدي الي قالي متقوليش عليه زباله جايز خاتمته تكون كويسه وجايز يبقى احسن من ناس كتير


برجوع حضرتك للبوست هتلاقي ان دي مش كلامي انا قولت اني لما سألت عنه دي أحسن كلمه اتقالت في حقه

 


خامسا

------

 
تعليقي على فتافيت .. مش المقصود بكلامي الرجاله بس .. انا بس ضربت المثل براجل انما البنات مش معصومه يعني


سادسا
---------

من احسن التعليقات الي جات والي جابت الي اقصده باختصار تعليق

 
momken يقول ..

 
بس السؤال الى فارض نفسه

احنا عاوزين ايه من المدون الا شويه افكار كويسهالقصد المفروض منقربش من حد لدرجه نشوف الديفوهات الى موجوده فى وجهه

انا وانتى بنشوف القمر جميل لكن لو طلعنا عنده وقربنا منه هنلاقيه خرابه

انا طبعا مش بدافع عن الناس دى لكنى بوصف ازاى نتقى شرهم


هو ده ببساطه الي انا قصدته من البوست كله

ان صاحب المدونه قدامنا هو بس مدون بيكتب كويس بيرد على التعليقات كويس

بـــــــــــــــــــس

هو ده اخر العلاقه .. اذا مفيش ثقه كبيره وسبب مبرر يبقى مفيش داعي للدخول في حوارات وصداقات مش ليها لزوم


يعني باختصار بلاش ندخل نفسنا في متاهات بدون داعي


وبكرر للمره المليـــــــــــــــــون ده مش تعميم ده للناس الي مش واثقين فيهم بنسبه مريحه


علشان الناس الكتير الي جات تقولي " صوابعك مش زي بعضها "


وأخيـــــــــــــــــــــــــرا ..


اللهم ارحمنا برحمتك ..


اللهم من اراد بنا او بأحد من المسلمين سوءا فرد كيده في نحره انك على كل شىء قدير


............................................................................................................

يلا اقـــــــــــــــــــعــــــــــــــــــــدو بالعــــــــــــــــــــــــــــــــــــــــــــــــــافيه

7 أغسطس، 2010




السلام عليكم ورحمة الله وبركاته
ــــــــــــــــــــــــــــــــــــــــــــــــــــــــــــــــــــــــــــــــ

 


الجواب طبعا باين من عنوانه

" المدونون سيئو السمعه "

اول ما دخلت عالم التدوين ده كنت شايفاه مش زي اي عالم تاني

يعني كنت بحسبه كله نظيف

لغايه ما عن طريق الصدفه عرفت ان في واحد من المدونين مش كويس

ولاحظت من التعليقات انه بيحوم حوالين واحده مدونه

قولت استشير واحده ليها باع طويل مع التدوين وعارفه معظم الناس

ولما  سألت عن الشخص ده مين ... قال ايه انا مرضيتش اقول

راحت ادتني 3 امثله لمدونين

قولتلها يالهووووووووووي كل دول ؟؟

قالتلي امال انتي فاكره ايه .. انتي جايه منين يابنتي

المهــــــــــــــــــــــــــــــــــــــــــــــــــــــــم

في اللقاء التجريبي الي كان عندنا في الجامعه فتحت الموضوع ده

وفوجئت بالردود عن ناس لايمكن نتخيل انهم مش كويسين

انا هتكلم عن شخصيه معينه .. دي شخصيه مذكره

انا شخصيا كان لايمكن اصدق انها على رأس قائمه المدونين سيئي السمعه

هو في الحقيقه انا مش جمعني اي حوار مع الشخصيه دي الا من خلال التعليقات في المدونات

لكن كنت بعتبره شخصيه محترمه يمكن لان مدونته بتقول كده ويمكن لان مركزه ومهنته بيقولو كده

وجايز بسبب سنه انه مش صغير على لعب العيال

من مده دخلت واحده شتمته في مدونته وانا استغربت جدا ان انسان محترم زي ده حد يغلط فيه

ولان الصدفه كانت هتجمعني بشغل معاه قولت استفسر الاول

واحسن كلمه اتقالت في حقه " ده شخصيه زباله "

مع الاعتذار عن اللفظ طبعا

والجميل في الموضوع ان التعليقات عنده مش بتقل عن 40 - 50 تعليق

انما بحق ربنا هو يمتلك موهبه جباره ومدونته جميله

انا في وقت قررت ادخل واكتب القائمه كلها وكل الناس الي معروف انهم مش محترمين بين المدونين

علشان نقاطعهم

بس بصراحه لقيت ان مفيش اسهل من واحد غير معرف يجي يغلط فيا انا هههههههههههههه

قولت امشي جنب الحيط احسن

لكن بصراحه الموضوع استفزني جدااااااااااااااااا

.................................................................................................................


الموضوع ده مش تشهير بحد . ده علشان كل واحد ياخد باله

وكل واحد مش محترم يعرف انه مكشوف وكلنا عارفينه